ໃນໄລຍະທີ່ຜ່ານມາ, ສະພາບອາກາດມີການປ່ຽນແປງຢ່າງຮຸນແຮງເຮັດໃຫ້ເກີດມີພາຍຸ ແລະ ຝົນຕົກໜັກຕໍ່ເນື່ອງໃນຫຼາຍຂົງເຂດທົ່ວປະເທດລາວ. ແຂວງບໍລິຄຳໄຊ ເປັນແຂວງໜຶ່ງທີ່ໄດ້ຮັບຜົນກະທົບຈາກພາຍຸ (Talim) ສົ່ງຜົນໃຫ້ມີຝົນທີ່ຕົກໜັກຢ່າງຕໍ່ເນື່ອງ ນັບຕັ້ງແຕ່ທ້າຍເດືອນ ກໍລະກົດ ເຖິງ ຕົ້ນເດືອນສິງຫາ 2023, ເຊິ່ງເຮັດເກີດຄວາມເສຍຫາຍໃນຫຼາຍດ້ານ ເຊັ່ນ: ດິນເຈື່ອນ, ເສັ້ນທາງເປ່ເພ, ນ້ຳຖ້ວມກະທັນຫັນ ແລະ ປະຊາຊົນຫຼາຍຫຼັງຄາເຮືອນໄດ້ຮັບຜົນກະທົບຈາກໄພຂົ່ມຂູ່ທາງທຳມະຊາດຄັ້ງນີ້.
ດັ່ງນັ້ນ, ບໍລິສັດ ໄຟຟ້ານໍ້າເທີນ 1 ຈຳກັດ ຈຶ່ງໄດ້ປະກອບສ່ວນສົມທົບທຶນ ຈຳນວນ 100,000,000 ກີບ ເພື່ອຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ ແຂວງ ບໍລິຄຳໄຊ ທີ່ ສະໂມສອນຫ້ອງວ່າການແຂວງ ໃນວັນທີ 29 ສິງຫາ 2023 ທີ່ຜ່ານມາ. ເຊິ່ງເປັນກຽດມອບທຶນສົມທົບ ໂດຍ ທ່ານ ຣັດສະໝີ ຍຸພານິດ – ຜູ້ອຳນວຍການໃຫຍ່, ບໍລິສັດ ໄຟຟ້ານໍ້າເທີນ 1 ຈຳກັດ ພ້ອມດ້ວຍທີມງານ ແລະ ເປັນກຽດຮັບ ໂດຍ ທ່ານ ປອ. ກອງແກ້ວ ໄຊສົງຄາມ – ເຈົ້າແຂວງບໍລິຄຳໄຊ ພ້ອມດ້ວຍພາກສ່ວນທີ່ກ່ຽວຂ້ອງລວມມີຜູ້ຕາງໜ້າຈາກຫ້ອງວ່າການແຂວງ ແລະ ພະແນກແຮງງານ ແລະ ສະຫວັດດີການສັງຄົມແຂວງ ເຂົ້າຮ່ວມເປັນສັກຂີພິຍານ.
ລະຫວ່າງການ ມອບ-ຮັບ ໃນຄັ້ງນີ້, ທ່ານ ຣັດສະໝີ ຍຸພານິດ ໄດ້ສະແດງຄວາມເປັນຫ່ວງເປັນໃຍເຖິງປະຊາຊົນແຂວງບໍລິຄຳໄຊທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ໂດຍສະເພາະການສ້ອມແປງເສັ້ນທາງ ແລະ ຊ່ວຍເຫຼືອຜູ້ປະສົບໄພຢູ່ເຂດພູໄຮ, ເຊິ່ງ ທ່ານ ປອ. ກອງແກ້ວ ໄຊສົງຄາມ ກໍ່ໄດ້ສະແດງຄວາມຂອບໃຈຕໍ່ການຊ່ວຍເຫຼືອຄັ້ງນີ້ ແລະ ຈະນຳໃຊ້ທຶນດັ່ງກ່າວໄປຊ່ວຍເຫລືອຜູ້ໄດ້ຮັບຜົນກະທົບຈາກໄພພິບັດຢູ່ແຂວງບໍລິຄຳໄຊໃຫ້ທົ່ວເຖິງ. ໃນຕອນທ້າຍ, ທ່ານ ປອ. ກອງແກ້ວ ໄຊສົງຄາມ ຍັງໄດ້ມອບໃບຍ້ອງຍໍຂັ້ນສູງສຸດລະດັບແຂວງ ໃຫ້ກັບ ບໍລິສັດ ໄຟຟ້ານ້ຳເທີນ 1 ສຳລັບຜົນງານການປະກອບສ່ວນດ້ານງົບປະມານ ເຂົ້າໃນການຊ່ວຍເຫຼືອປະຊາຊົນທີ່ຖືກອຸຖົກກະໄພຢູ່ແຂວງບໍລິຄຳໄຊ ໃນຄັ້ງນີ້ອີກດ້ວຍ.
- ທ່ານສາມາດເບິ່ງລາຍລະອຽດເພີ່ມເຕີມໄດ້ທີ່ https://bit.ly/3sLpo3z
