ບໍ່ດົນມານີ້, ບໍລິສັດ ໄຟຟ້າ ນໍ້າເທີນ 1 ຈຳກັດ (NT1PC) ໄດ້ອໍານວຍຄວາມສະດວກ ໃຫ້ແກ່ການຈັດກິດຈະກໍາການແລກປ່ຽນຄວາມຮູ້ແບບ ບ້ານເຖິງບ້ານ ທີ່ບ້ານຫ້ວຍຫອຍ, ເມືອງວຽງທອງ, ແຂວງ ບໍລິຄຳໄຊ. ກິດຈະກຳດັ່ງກ່າວ ແມ່ນເຕົ້າໂຮມເອົາຜູ້ຕາງໜ້າຈາກເມືອງປາກກະດິງ ລວມມີຄະນະປະຈຳພັກເມືອງ, ຫ້ອງການສະຫະພັນແມ່ຍິງ, ຫ້ອງການການຄ້າເມືອງ, ຄະນະກອງທຶນຂັ້ນບ້ານ ແລະ ນາຍບ້ານຈາກ 7 ບ້ານລຸ່ມເຂື່ອນ ເພື່ອເຂົ້າຮ່ວມແບ່ງປັນຄວາມຮູ້ ແລະ ປະສົບການໃນການບໍລິຫານກອງທຶນຂັ້ນບ້ານ ແລະ ກິດຈະກຳສົ່ງເສີມຊີວິດການເປັນຢູ່ຕ່າງໆ ກັບທາງບ້ານຫ້ວຍຫອຍ, ຫ້ອງການສະຫະພັນແມ່ຍິງ ແລະ ຫ້ອງການການຄ້າເມືອງວຽງທອງ.
ກິດຈະກຳດັ່ງກ່າວມີຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ສົ່ງເສີມການພັດທະນາແບບຍືນຍົງ. ໂດຍຜ່ານການຮຽນຮູ້ ແລະ ການໃຫ້ໂອກາດແກ່ຜູ້ເຂົ້າຮ່ວມໄດ້ໂອ້ລົມກັນເຊິ່ງກັນ ແລະ ກັນ ພວກເຂົາຈຶ່ງສາມາດແລກປ່ຽນບົດຮຽນ, ຈຸດດີຈຸດອ່ອນ ແລະ ການແກ້ໄຂບັນຫາສິ່ງທ້າທາຍຕ່າງໆທີ່ເກີດຂຶ້ນໃນຊຸມຊົນ.
ບັນດາກິດຈະກຳທີ່ສຳຄັນທີ່ນຳມາເປັນບ່ອນອີງໃນການແລກປ່ຽນປະສົບການ ແລະ ການແບ່ງປັນບົດຮຽນລວມມີ: ການຢ້ຽມຢາມກິດຈະກຳສົ່ງເສີມຊີວິດການເປັນຢູ່ພາຍໃນບ້ານຫ້ວຍຫອຍ ເຊັ່ນວ່າ ການປູກຜັກໃນເຮືອນຮົ່ມ, ການປູກເຫັດ, ການຕໍ່າຫູກ, ການຜະລິດດິນບັອກ ເປັນຕົ້ນ. ນອກນີ້, ຍັງໄດ້ຈັດໃຫ້ມີການປະຊຸມຮັບຟັງການລາຍງານການບໍລິຫານກອງທຶນບ້ານ ແລະ ການຄຸ້ມຄອງຮ້ານຄ້າຊຸມຊົນຂອງບ້ານຫ້ວຍຫອຍ ເຊິ່ງຜູ້ເຂົ້າຮ່ວມໄດ້ມີໂອກາດໃນການແບ່ງປັນປະສົບການ ແລະ ຖາມຕອບ ເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ.
ພາຍຫຼັງການຢ້ຽມຢາມ ແລະ ແລກປ່ຽນປະສົບການໃນຄັ້ງນີ້, ຕາງໜ້າຈາກບ້ານລຸ່ມເຂື່ອນທັງ 7 ບ້ານ ຈະໄດ້ປະສານງານສືບຕໍ່ເຮັດວຽກຮ່ວມກັບຄະນະປະຈຳພັກເມືອງ, ຫ້ອງການສະຫະພັນແມ່ຍິງ ແລະ ຫ້ອງການການຄ້າເມືອງ ເມືອງປາກກະດິງ ໃນການຜັນຂະຫຍາຍບົດຮຽນທີ່ໄດ້ຈາກການແລກປ່ຽນບົດຮຽນໃນຄັ້ງນີ້ ເພື່ອປັບປຸງວຽກງານການບໍລິຫານກອງທຶນຂັ້ນບ້ານ ແລະ ກິດຈະກຳສົ່ງເສີມຊີວິດການເປັນຢູ່ໃນຊຸມຊົນຂອງຕົນໃຫ້ດີຂຶ້ນ. ໃນສ່ວນຂອງ ບໍລິສັດ ໄຟຟ້າ ນໍ້າເທີນ 1 ຍັງຄົງມຸ່ງຫມັ້ນທີ່ຈະສືບຕໍ່ສະໜັບສະໜູນການຈັດຕັ້ງປະຕິບັດກິດຈະກຳ ແລະ ສົ່ງເສີມການຮ່ວມມືໃນໄລຍະຍາວກັບຊຸມຊົນທ້ອງຖິ່ນ.