ບໍລິສັດ ໄຟຟ້າ ນໍ້າເທີນ 1 ຈຳກັດ ພວມຢູ່ໃນໄລຍະການກວດກາລະບົບເຄື່ອງຜະລິດໄຟຟ້າ ແລະ ອຸປະກອນ ອື່ນໆ ເພື່ອຮັບປະກັນການຜະລິດໄຟຟ້າ ໃຫ້ມີປະສິດທິພາບ ແລະ ຄວາມປອດໄພ ເພື່ອຮັບປະກັນການສະໜອງໄຟຟ້າຢ່າງຕໍ່ເນື່ອງສະໝໍ່າສະເໜີ.
ເພື່ອຮັບປະກັນການດຳເນີນງານຂອງເຂື່ອນໄຟຟ້ານ້ຳເທີນ 1 ໃຫ້ມີຄວາມປອດໄພ ແລະ ມີປະສິດທິພາບສູງ, ປະຈຸບັນ ໂຮງງານໄຟຟ້າ ຂອງ ບໍລິສັດ ໄຟຟ້າ ນ້ຳເທີນ 1 ທີ່ເມືອງປາກກະດິງ, ແຂວງບໍລິຄຳໄຊ ພວມຢູ່ໃນໄລຍະການກວດກາແບບຄົບຊຸດ ໂດຍການໄຟຟ້າຝ່າຍຜະລິດແຫ່ງປະເທດໄທ (EGAT). ແຜນການກວດກາດັ່ງກ່າວນີ້ ແມ່ນນອນຢູ່ໃນພັນທະ ສັນຍາການຊື້-ຂາຍໄຟຟ້າ (PPA) ລະຫວ່າງ NT1PC ແລະ EGAT ເຊິ່ງຈະໄດ້ຖືກປະຕິບັດເປັນປະຈໍາທຸກໆ 3 ປີ.
ໃນລະຫວ່າງວັນທີ 12 ຫາ 29 ມັງກອນ 2025, ທີງານເຕັກນິກທີ່ມີຄວາມຊໍານິຊໍານານຂອງ EGAT ກໍາລັງດໍາເນີນການກວດກາລະບົບການຄວບຄຸມທີ່ສຳຄັນໃນໂຮງໄຟຟ້າ ນໍ້າເທີນ 1 ຢ່າງລະອຽດ ເຊິ່ງລວມມີ ກັງຫັນ ແລະ ເຄື່ອງກໍາເນີດໄຟຟ້າ, ລະບົບກົນຈັກ ແລະ ລະບົບຄວບຄຸມຕ່າງໆ. ໃນນີ້ຂະບວນການກວດກາດັ່ງກ່າວນີ້ປະກອບດ້ວຍ ການວັດແທກ, ການກວດກາ, ການກວດສອບ, ການທຳຄວາມສະອາດ, ການທົດສອບ ແລະ ວິເຄາະຄວາມສ່ຽງຕ່າງໆ ເພື່ອຮັບປະກັນການເຮັດວຽກຢ່າງຕໍ່ເນື່ອງ.
ບໍລິສັດ ໄຟຟ້າ ນໍ້າເທີນ 1 ຈຳກັດ ໄດ້ເອົາໃຈໃສ່ຕໍ່ກິດຈະກໍາບໍາລຸງຮັກສາເຄື່ອງຈັກທີ່ກໍານົດໄວ້ໃນສັນຍາຊື້-ຂາຍໄຟຟ້າຢ່າງເຄັ່ງຄັດ. ທັງນີ້ຍ້ອນການກວດກາແມ່ນມີຄວາມສຳຄັນຕໍ່ການຮັບປະກັນການດຳເນີນງານທີ່ປອດໄພຢ່າງຕໍ່ເນື່ອງ ແລະ ມີປະສິດທິພາບຂອງໂຮງໄຟຟ້ານ້ຳເທີນ 1 ເພື່ອເປັນການຢັ້ງຢືນເຖິງຄວາມມຸ່ງໝັ້ນຂອງພວກເຮົາໃນການສະໜອງແຫຼ່ງໄຟຟ້າທີ່ເຊື່ອຖືໄດ້ ແລະ ຍືນຍົງ.
