ເມືອຄັ້ງວັນທີ 30 ມັງກອນ 2025, ບໍລິສັດ ໄຟຟ້າ ນ້ຳເທີນ 1 ຈຳກັດ ໄດ້ຈັດກອງປະຊຸມ ສະພາບໍລິຫານ ຄັ້ງທີ 1 ປີ 2025 ທີ່ຫ້ອງປະຊຸມທະນາຄານພັດທະນາລາວ. ການປະຊຸມໃນຄັ້ງນີ້ເປັນກອງປະຊຸມຊຸດພິເສດ ທີ່ຄະນະສະພາບໍລິຫານຈາກ ບໍລິສັດ ຜະລິດໄຟຟ້າ ຈຳກັດ ມະຫາຊົນ (EGCO) ປະເທດໄທ, ໃຫ້ກຽດເດີນທາງມານະຄອນຫຼວງວຽງຈັນ ເພື່ອເຂົ້າຮ່ວມປະຊຸມຊ້ອງໜ້າ ຮ່ວມກັບຄະນະສະພາບໍລິຫານຈາກບໍລິສັດ ຈະເລີນເຊກອງພະລັງງານ ຈຳກັດ (CSE) ແລະ ບໍລິສັດ ຜະລິດ ໄຟຟ້າລາວ ມະຫາຊົນ (EDL-Gen).
ກອງປະຊຸມດັ່ງກ່າວ ໂດຍການເປັນປະທານຂອງ ທ່ານ ຈັນທະໜອມ ພົມມະນີ ປະທານ ສະພາບໍລິຫານ, ການປະຊຸມ ໄດ້ດຳເນີນໄປຢ່າງລ່ຽນໄຫຼ ແລະ ມີປະສິດທິຜົນ. ໂດຍກວມເອົາຫຼາຍວາລະການປະຊຸມ, ຄະນະສະພາບໍລິຫານໄດ້ຮັບຊາບການລາຍງານກ່ຽວກັບຄວາມຄືບໜ້າຂອງການປະຕິບັດງານຂອງ ບໍລິສັດ ໄຟຟ້ານໍ້າເທີນ 1 ຈຳກັດ ແລະ ພິຈາລະນາລົງມະຕິຮັບຮອງເອົາວຽກງານທີ່ສຳຄັນ ພ້ອມທັງໃຫ້ທິດຊີ້ແນະແກ່ຄະນະບໍລິຫານ NT1PC ເພື່ອເປັນແນວທາງໃນການປັບປຸງ ແລະ ພັດທະນາການປະຕິບັດວຽກງານໃນຕໍ່ໜ້າໃຫ້ມີປະສິດທິພາບຂື້ນເລື່ອຍໆ. ພາຍຫຼັງການປະຊຸມ, ຄະນະສະພາບໍລິຫານງານ EGCO ໄດ້ຖືໂອກາດນີ້ມອບກະຕ່າຂອງຂວັນ ແລະ ອວຍພອນປີໃໝ່ໃຫ້ແກ່ທ່ານ ຈັນທະໜອມ ພົມມະນີ ແລະ ທ່ານ ວົງສະກຸນ ຍິ່ງຍົງ, ສະມາຊິກສະພາບໍລິຫານຈາກ EDL-Gen.
ບໍລິສັດໄຟຟ້າ ນ້ຳເທີນ 1 ຂໍສະແດງຄວາມຂອບໃຈເປັນຢ່າງສູງມາຍັງຄະນະສະພາບໍລິຫານ ທີ່ໄດ້ໃຫ້ທິດຊີ້ນຳຢ່າງຕໍ່ເນື່ອງແກ່ບໍລິສັດຂອງພວກເຮົາ ເຊິ່ງມັນເປັນເຄື່ອງມືໃນການຮັບປະກັນການດຳເນີນງານຂອງບໍລິສັດໃຫ້ມີຄວາມຄ່ອງໂຕ, ມີປະສິດທິພາບ ແລະ ມີຄວາມຮັບຜິດຊອບຕໍ່ສິ່ງແວດລ້ອມ ແລະ ສັງຄົມ.
