ບໍລິສັດ ໄຟຟ້າ ນໍ້າເທີນ 1 ຈຳກັດ ໄດ້ສະໜັບສະໜູນງົບປະມານ 6,515,000 ກີບ ໃຫ້ແກ່ກອງບັນຊາການປ້ອງກັນຄວາມສະຫງົບ ເມືອງວຽງທອງ, ແຂວງບໍລິຄຳໄຊ ເພື່ອລົງໂຄສະນາເຜີຍແຜ່ຄວາມຮູ້ໃຫ້ແກ່ ຊຸມຊົນໃນສາມຫົວຂໍ້ຫຼັກ ຄື 1) ການຂັບຂີ່ປອດໄພ, 2) ຜົນຮ້າຍຂອງຢາເສບຕິດ ແລະ 3) ຕ້ານການຄ້າມະນຸດ ໂດຍມີຈຸດປະສົງເພື່ອ ໃຫ້ຊຸມຊົນຮັບຮູ້ບັນຫາ, ສາເຫດ ແລະ ຜົນກະທົບດັ່ງກ່າວ ເພື່ອສົ່ງເສີມໃຫ້ສັງຄົມມີຄວາມປອດໄພ, ສະຫງົບສຸກ ແລະ ເປັນລະບຽບຮຽບຮ້ອຍໃນການດຳລົງຊີວິດ.
ການລົງເຜີຍແຜ່ໃນຄັ້ງນີ້ ເນັ້ນສາມບ້ານເປົ້າໝາຍ ຄື: ບ້ານເມືອງມ່ວນ, ຈອມທອງ, ຫ້ວຍຫອຍ ເຊິ່ງໄດ້ຈັດຂຶ້ນນັບຕັ້ງແຕ່ວັນທີ 24-26 ມີນາ 2025 ໂດຍມີເຈົ້າໜ້າທີ່ຈາກຫ້ອງການປ້ອງກັນຄວາມສະຫງົບ ເມືອງວຽງທອງ ແຂວງບໍລິຄໍາໄຊ ເຊິ່ງລວມມີ ພັຕ ຄຳເຟື່ອນ ສີປະເສິດ ຮອງພະແນກ ຕຳຫຼວດຊີ້ນຳກອງຈະລາຈອນ, ຮອ ບຸນທຳ ຄຳມູນວົງ ຮອງພະແນກ ຕຳຫຼວດຊີ້ນໍາຢາເສບຕິດ, ພັຕ ຄຳອ້ວນ ພິລາໄຊ ຫົວໜ້າກອງຈະລາຈອນ ແລະ ຮທ ທອງສຸກ ສີບຸນເຮືອງ ຫົວໜ້າໜ່ວຍງານ ສືບສວນຄະດີອາຍາເສດຖະກິດ ເປັນຜູ້ເຜີຍແຜ່ຄວາມຮູ້ໃນຄັ້ງນີ້. ສຳລັບກຸ່ມເປົ້າໝາຍຂອງພວກເຮົາ ໄດ້ແບ່ງອອກເປັນ 2 ກຸ່ມ ຄື: ພໍ່ແມ່ປະຊາຊົນ ແລະ ນ້ອງນັກຮຽນ ທີ່ບ້ານເມືອງມ່ວນ, ບ້ານຫ້ວຍຫອຍ, ໂຮງຮຽນ ມັດທະຍົມສົມບູນຈອມທອງ ແລະ ໂຮງຮຽນ ມັດທະຍົມຕອນຕົ້ນຫ້ວຍຫອຍ ຊຶ່ງມີຜູ້ເຂົ້າຮ່ວມທັງໝົດ 391 ຄົນ, ຍິງ 171 ຄົນ.
ໃນແຕ່ລະຫົວຂໍ້ທີ່ໄດ້ລົງເຜີຍແຜຄັ້ງນີ້, ທາງເຈົ້າໜ້າທີ່ ໄດ້ນຳສະເໜີບັນຫາ ແລະ ສິ່ງທີ່ສຳຄັນໃນແຕ່ລະວຽກງານ ຄື: ໃນການຂັບຂີ່ປອດໄພ ກໍ່ໄດ້ເນັ້ນໜັກໃສ່ການໃຫ້ຄວາມຮູ້ ດ້ານກົດລະບຽບການຈະລາຈອນ, ປ້າຍ, ເຄື່ອງໝາຍ, ສາລະບານເດີນລົດ. ນອກນີ້, ຍັງໄດ້ສາຍວີດີໂອສັ້ນ ແລະ ຮູບພາບທີ່ສ່ອງແສງເຖິງການລະເມີດ ຫຼື ຄວາມປະໝາດໃນການຂັບຂີ່ທີ່ພາໃຫ້ເກີດອຸບັດຕິເຫດ; ສຳລັບຫົວຂໍ້ຜົນຮ້າຍຂອງຢາເສບຕິດ ກໍ່ໄດ້ເນັ້ນໜັກໃສ່ສິ່ງເສບຕິດຊະນິດໃໝ່ທີ່ແຜ່ລະບາດໃນສັງຄົມລາວ ໂດຍສະເພາະ ໃນກຸ່ມໄວໜຸ່ມ ພ້ອມທັງນຳສະເໜີຜົນຮ້າຍທີ່ກະທົບຕໍ່ຊີວິດ ແລະ ສັງຄົມ; ສຳລັບການຕ້ານການຄ້າມະນຸດ ກໍ່ແມ່ນໄດ້ເວົ້າກ່ຽວກັບກົນໄກ ແລະ ວິທີການຄ້າມະນຸດທີ່ຜູ້ກະທຳຜິດໄດ້ນຳໃຊ້ຕວົະຍວົະຫຼອກລວງ ໂດຍສະເພາະ ການຕວົະຍວົະເອົາເດັກນ້ອຍ ແລະ ໄວໜຸ່ມໄປແຕ່ງງານກັບຄົນຕ່າງປະເທດ ເພື່ອເປັນການເຕືອນສະຕິໃຫ້ແກ່ທັງບັນດາຜູ້ປົກຄອງ ແລະ ນັກຮຽນໄດ້ຮູ້ເທົ່າທັນກົນໂກງເລ່ຫຼ່ຽມ ເພື່ອບໍ່ໃຫ້ຕົກເປັນເຫຍື່ອໃນຂະບວນການດັ່ງກ່າວ.
ການເຜີຍແຜ່ຄວາມຮູ້ໃຫ້ຊຸມຊົນໃນສາມບ້ານ/ໂຮງຮຽນຄັ້ງນີ້ ແມ່ນເຕັມໄປດ້ວຍຄວາມຟົດຟື້ນ ແລະ ຜູ້ເຂົ້າຮ່ວມກໍ່ໄດ້ໃຫ້ຄວາມສົນໃຈເປັນຢ່າງດີ. ສຳລັບ ບໍລິສັດ ໄຟຟ້າ ນໍ້າເທີນ 1 ຈຳກັດ, ພວກເຮົາມີຄວາມດີໃຈທີ່ໄດ້ປະກອບສ່ວນເຂົ້າໃນກິດຈະກຳໂຄສະນາເຜີຍແຜ່ໃນຄັ້ງນີ້ ແລະ ພວກເຮົາເຊື່ອວ່າ ການສົ່ງເສີມໃຫ້ປະຊາຊົນໄດ້ມີຄວາມຮູ້ຄວາມເຂົ້າໃຈຕໍ່ກັບບັນຫາເຫຼົ່ານີ້ ຈະຊ່ວຍໃຫ້ຊຸມຊົນ, ສົງຄົມ ມີຄວາມຕະໜັກຮູ້ ແລະ ເຮັດໃຫ້ຕົນເອງມີຄວາມປອດໄພຫຼາຍຂຶ້ນ.