ງານກິລາຕ້ານສິ່ງເສບຕິດຂອງໂຮງຮຽນ ມັດທະຍົມສົມບູນ ປາກກະດິງ ເປັນກິດຈະກຳໜຶ່ງທີ່ຈັດຂຶ້ນໃນທຸກໆປີ ເຊິ່ງມັນເປີດໂອກາດໃຫ້ ນັກຮຽນໄດ້ມີເວທີສະແດງຄວາມສາມາດຂອງຕົນເອງ ບໍ່ວ່າຈະເປັນດ້ານກິລາ ແລະ ສິລະປະ ຜ່ານການແຂ່ງຂັນພາຍໃນໂຮງຮຽນ. ນອກນີ້, ງານດັ່ງກ່າວຍັງມີອີກໜຶ່ງວາລະທີ່ສຳຄັນ ນັ້ນກໍ່ຄືການມອບລາງວັນໃຫ້ແກ່ນັກຮຽນ ຜູ້ທີ່ມີຜົນງານດີເດັ່ນໃນການແຂ່ງຂັນດ້ານວິຊາການລະຫວ່າງໂຮງຮຽນ.
ເນື່່ອງຈາກເຫັນໄດ້ເຖິງຄວາມສຳຄັນຂອງງານດັ່ງກ່າວ, ບໍລິສັດ ໄຟຟ້າ ນໍ້າເທີນ 1 ຈຳກັດ ຈຶ່ງໄດ້ປະກອບສ່ວນສະໜັບສະໜູນເງິນ ຈຳນວນ 5,400,000 ກີບ ໃຫ້ແກ່ໂຮງຮຽນ ມັດທະຍົມສົມບູນປາກກະດິງ ເພື່ອເປັນລາງວັນໃຫ້ແກ່ນັກຮຽນເກັ່ງ ແລະ ນັກກິລາຂອງໂຮງຮຽນ ຊຶ່ງເປັນການກະຕຸກຊຸກຍູ້ພວກເຂົາເຫຼົ່ານີ້ໃຫ້ມີກໍາລັງໃຈ ເພື່ອສືບຕໍ່ພັດທະນາຕົນເອງ ໃຫ້ກາຍເປັນບຸກຄົນທີ່ມີຄວາມຮູ້ຄວາມສາມາດຮອບດ້ານໃນອະນາຄົດ.
ໃນວັນທີ 28 ມີນາ 2025 ທີ່ໂຮງຮຽນມັດທະຍົມສົມບູນປາກກະດິງ ຕາງໜ້າຈາກບໍລິສັດ ໄຟຟ້າ ນໍ້າເທີນ 1 ຈຳກັດ ນຳໂດຍ ທ່ານ ດາວວົງ ທອງມະນີວົງ, ຜູ້ການຈັດຝ່າຍບໍລິຫານ ພາກສະໜາມ ແລະ ທີມງານກ່ຽວຂ້ອງ ໄດ້ເຂົ້າຮ່ວມງານແຂ່ງຂັນສິລະປະ ແລະ ພິທີປິດງານກິລາຕ້ານສິ່ງເສບຕິດ. ນອກຈາກນີ້, ທາງທີມງານຍັງໄດ້ຮັບກຽດໃນການມອບລາງວັນໃຫ້ແກ່ນັກຮຽນເກັ່ງອີກດ້ວຍ.
ພວກເຮົາພູມໃຈທີ່ເຫັນຊາວໜຸ່ມເຍົາວະຊົນມີຄວາມຂະຫຍັນໝັ່ນພຽນ, ກ້າຫານ, ແລະ ກ້າຄິດ ກ້າສະແດງອອກໃນທາງທີ່ສ້າງສັນ. ພວກເຮົາຮູ້ສຶກດີໃຈທີ່ໄດ້ເປັນສ່ວນໜຶ່ງໃນການສົ່ງເສີມໃຫ້ພວກເຂົາມີກຳລັງໃຈທີ່ຢາກສືບຕໍ່ມູນເຊື້ອທີ່ດີງາມນີ້ຕໍ່ໄປ.
