ການເສີມສ້າງສາຍພົວພັນໃນການເຮັດວຽກຜ່ານງານກິລາ: NT1PC ແລະ ເຈົ້າໜ້າທີ່ (ທະຫານ, ຕຳຫຼວດ, ແລະ ໜ່ວຍຮັກສາຄວາມປອດໄພ)

ການເສີມສ້າງສາຍພົວພັນໃນການເຮັດວຽກຜ່ານງານກິລາ: NT1PC ແລະ ເຈົ້າໜ້າທີ່ (ທະຫານ, ຕຳຫຼວດ, ແລະ  ໜ່ວຍຮັກສາຄວາມປອດໄພ) Next item ບໍລິສັດ ໄຟຟ້າ ນໍ້າເທີນ 1...

ເຈົ້າໜ້າທີ່ ຈາກກອງບັນຊາການທະຫານ, ກອງບັນຊາການ ຕຳຫຼວດ ແລະ ໜ່ວຍງານຮັກສາຄວາມປອດໄພ ແມ່ນເປັນສ່ວນໜຶ່ງທີ່ມີບົດບາດສຳຄັນໃນການເບິ່ງແຍງດູແລຄວາມເປັນລະບຽບຮຽບຮ້ອຍ ແລະ ປ້ອງກັນຄວາມສະຫງົບ ລວມເຖິງ ຄວາມປອດໄພຕໍ່ຊີວິດ ແລະ ຊັບສິນ ຂອງບໍລິສັດ ໄຟຟ້າ ນໍ້າເທີນ 1 ຈໍາກັດ ໂດຍສະເພາະ ຫ້ອງການພາກສະໜາມປາກກະດິງຂອງພວກເຮົາ ນັບຕັ້ງແຕ່ໄລຍະດຳເນີນການກໍ່ສ້າງເປັນຕົ້ນມາ. ສະນັ້ນ, ເພື່ອເປັນການສືບຕໍ່ສ້າງສາຍພົວພັນອັນດີ ແລະ ຮັດແໜ້ນມິດຕະພາບ ລະຫວ່າງ ບໍລິສັດ ໄຟຟ້າ ນໍ້າເທີນ 1 ຈຳກັດ ແລະ ບັນດາເຈົ້າໜ້າທີ່ເຫຼົ່ານີ້, ນໍ້າເທີນ 1 ຈຶ່ງໄດ້ຈັດກິດຈະກຳ ກິລາມິດຕະພາບຂຶ້ນ ໃນວັນສຸກທີ 28 ມີນາ 2025 ຜ່ານມານີ້ ທີ່ສະໜາມກິລາບານເຕະ ຂອງຫ້ອງການພາກສະໜາມເຂື່ອນໄຟຟ້ານໍ້າເທີນ 1, ບ້ານ ໂພນຈະເລີນ, ເມືອງ ປາກກະດິງ, ແຂວງ ບໍລິຄຳໄຊ.

ການແຂ່ງຂັນໃນຄັ້ງນີ້ປະກອບດ້ວຍ 2 ທີມຄື: ທີມເຈົ້າໜ້າທີ່ ຊຶ່ງປະກອບດ້ວຍກອງບັນຊາການ ປກສ ແຂວງ ບໍລິຄຳໄຊ, ກອງບັນຊາການ ປກສ ແລະ ປກຊ ເມືອງ ປາກກະດິງ ແລະ ທີມນໍ້າເທີນ 1 ເຊິ່ງປະກອບດ້ວຍ ພະນັກງານຂອງບໍລິສັດ ໄຟຟ້າ ນໍ້າເທີນ 1 ແລະ ບໍລິສັດ E&E.  ກິລາທີ່ໄດ້ແຂ່ງຂັນກັນ ແບ່ງອອກເປັນ 2 ປະເພດຄື: ການແຂ່ງຂັນເຕະບານຊາຍ ແລະ ການແຂ່ງຂັນເປຕັ້ງຍິງ. ນັກກິລາທັງສອງທີມແມ່ນໄດ້ນຳເອົາເຫື່ອແຮງ, ພາລະກຳລັງ ແລະ ກົດລະຍຸດທຸກຢ່າງທີ່ມີອອກມາໃຊ້ກັນຢ່າງເຕັມທີ່ ເຊິ່ງຜົນການແຂ່ງຂັນກິລາ ສຳລັບບານເຕະ ແມ່ນສະເໝີກັນທີ່ 2-2 ແລະ ກິລາເປຕັ້ງ ແມ່ນທີມເຈົ້າໜ້າທີ່ຊະນະໄປຢ່າງທະລົ່ມທະລາຍ ໂດຍເກັບແຕ້ມໄປຈົນນັບບໍ່ຖ້ວນ ແລະ ອາດຈະນັບບໍ່ໄດ້ເລີຍກໍ່ວ່າໄດ້.

ເຖິງແມ່ນວ່າ ເກມການແຂ່ງຂັນຈະເຂັ້ມຂົ້ນຂື້ນ, ແຕ່ພາຍໃນງານດັ່ງກ່າວກໍ່ເຕັມໄປດ້ວຍຄວາມຟົດຟື້ນມ່ວນຊື່ນ ເຊິ່ງກິດຈະກຳນອກຮອບນີ້ ຊ່ວຍໃຫ້ທີມງານທັງສອງຝ່າຍ ໄດ້ພົບປະໂອ້ລົມກັນໃນບັນຍາກາດທີ່ຜ່ອນຄາຍ, ເຮັດໃຫ້ທັງສອງທີມເສີມສ້າງຄວາມສາມັກຄີ ແລະ ສ້າງສາຍພົວພັນທີ່ດີໃນການເຮັດວຽກຮ່ວມກັນຕໍ່ໄປ.