ອົງການມາດຕະຖານສາກົນ (ISO) ເປັນອົງການທີ່ບໍ່ຂຶ້ນກັບລັດຖະບານທີ່ມີຊື່ສຽງ ເຊິ່ງສ້າງຕັ້ງມາດຕະຖານເພື່ອຮັບປະກັນຄຸນນະພາບ, ຄວາມປອດໄພ, ແລະ ປະສິດທິພາບຂອງຜະລິດຕະພັນ, ບໍລິການ, ແລະ ລະບົບໃນການປະຕິບັດວຽກງານ. ທຸລະກິດຕ່າງໆ ສາມາດໄດ້ຮັບໃບຢັ້ງຢືນ ISO ເພື່ອຢັ້ງຢືນການປະຕິບັດຕາມມາດຕະຖານຂະບວນການທີ່ມີຄຸນນະພາບ ເຊິ່ງກໍານົດໂດຍອົງການມາດຕະຖານສາກົນ (ISO). ການບັນລຸການຢັ້ງຢືນ ISO ສະແດງໃຫ້ເຫັນຄວາມມຸ່ງຫມັ້ນ ແລະ ເຈດຈຳນົງຂອງບໍລິສັດ ທີ່ຈະບັນລຸມາດຕະຖານທີ່ເຂັ້ມງວດ. ດັ່ງນັ້ນ, ຈຶ່ງເຮັດທຸລະກິດດັ່ງກ່າວມີຄວາມໜ້າເຊື່ອຖື ແລະ ເພີ່ມຄວາມໝັ້ນໃຈໃຫ້ແກ່ລູກຄ້າ ແລະ ຄູ່ຮ່ວມທຸລະກິດຍຸດທະສາດ.
ອີງຕາມເງື່ອນໄຂທີ່ໄດ້ລະບຸໄວ້ໃນ ເອກະສານຊ້ອນທ້າຍ C (ຂໍ້ 35, b, ໜ້າ 25) ຂອງສັນຍາສໍາປະທານ (CA) ລະຫວ່າງລັດຖະບານລາວ (GoL) ແລະ ບໍລິສັດ ໄຟຟ້າ ນ້ຳເທີນ 1 ຈຳກັດ (NT1PC), ເຊິ່ງໄດ້ກຳນົດໃຫ້ NT1PC ບັນລຸການປະຕິບັດຕາມຂໍ້ກຳນົດຂອງລະບົບການຄຸ້ມຄອງມາດຕະຖານ ISO ພາຍໃນ ສອງປີ (2) ຈາກວັນທີດໍາເນີນການຊື່-ຂາຍໄຟຟ້າ (COD) ໃນວັນທີ 12 ສິງຫາ 2022.
ດັ່ງນັ້ນ, ບໍລິສັດ ໄຟຟ້າ ນ້ຳເທີນ 1 ຈຳກັດ ໄດ້ຮັບການຢັ້ງຢືນລະບົບຄຸ້ມຄອງຄຸນນະພາບ ISO 9001:2015 ແລະ ການຢັ້ງຢືນລະບົບຄຸ້ມຄອງສິ່ງແວດລ້ອມ ISO 14001:2015. ໂດຍຜ່ານການຮ່ວມມືກັບທຸກພາກສ່ວນກ່ຽວຂ້ອງ, NT1PC ໄດ້ປະສົບຜົນສໍາເລັດຕາມຂໍ້ກຳນົດຕ່າງໆ ເພື່ອຂໍການຢັ້ງຢືນມາດຕະຖານ ISO ແລະ ໄດ້ຮັບການຢັ້ງຢືນຢ່າງເປັນທາງການ ໃນວັນທີ 02 ມິຖຸນາ 2024.
ຈາກຜົນສຳເລັດດັ່ງກ່າວ, ບໍລິສັດ ໄຟຟ້າ ນ້ຳເທີນ 1 ຈຳກັດ ຈຶ່ງມີຄວາມພາກພູມໃຈຢ່າງຍິ່ງ ໃນການປະກາດການຮັບຮອງ ISO 9001:2015 ແລະ ISO 14001:2015 ເຊິ່ງເປັນຂີດໝາຍອັນສໍາຄັນຂອງບໍລິສັດ.